En familie. Seks fortellinger

Gruppeutstilling i Galleriet og Låven

21. juni – 7. september 2025

Hanne Borchgrevink | Tore Hansen | Ellen Henriette Suhrke | Marthe Kampen |  Johannes Borchgrevink Hansen | Hans Kristian Borchgrevink Hansen

Hanne Borchgrevink

Hanne Borchgrevink (f. 1951) bur saman med kunstnarmannen Tore Hansen på Finnskogen. I naturskjøne omgjevnader har dei både heim og atelier på same stad.  Hanne er utdanna ved Statens kunstakademi og Statens kunst- og håndverksskole.

Hanne har lenge arbeida med forenkla hus som motiv. Å kombinere farger og flater slik at det oppstår eit maksimalt visuelt uttrykk er målet hennar. At folk har forhald til hus og tek med seg eigne assosiasjonar når dei ser på bileta, kan gje publikum ei tilleggsoppleving. I dei seinare åra har ho også laga landskapsbilete, der utfordringa er å få eit resultat med same enkelheit og kraft som hun søker å oppnå i husbileta.

Hanne har delteke på ei rekkje kollektivutstillingar og halde mange separatutstillingar i inn- og utland. Ho har også utført fleire offentlege utstmykningsoppdrag og er innkjøpt av bl.a. Nasjonalgalleriet, Museet for samtidskunst og Bergen Billedgalleri.

Tore Hansen

Tore Hansen (f. 1949) bur saman med kunstnaren Hanne Borchgrevink på Finnskogen. I naturskjøne omgjevnader har dei både heim og atelier på same stad.  Tore er utdanna ved Statens kunstakademi og Statens kunst- og håndverksskole.

Tore tek ofte utgangspunkt i dei skogfinske røtene sine. Han forsøker i eit forenkla formspråk å lage eit avtrykk som tilsvarar vår indre førestilling om begrepa; altså grunnideen om dyret, treet og vandraren.

Tore har delteke på ei rekkje kollektivutstillingar og hatt  separatutstillingar rundt i Norge. Arbeida hans er kjøpt inn av sentrale private og offentlege samlingar i Norge og utlandet.

Ellen Henriette Suhrke

Ellen Henriette Suhrke (f. 1984) sin kunstnariske praksis kan beskrivast som meditasjonar over natur og kultur, kor mennesket sitt forhald til omgjevnadene står sentralt. Fleire av arbeida er i grenseland mellom kunst og formidling, og fokuserer på korleis ein kan erfare omgjevnadene med andre sansar enn synssansen. Dette har resultert i taktile omsyningar for blinde deltakarar i Botanisk hage og på Nasjonalmuseet, som har blitt gjengjeve i form av videoar, lydvandringar og taktile fotobøker. I eit anna prosjekt fokuserer ho på spesifikke naturområde og fotograferer planter og anna naturmateriale som har ei spesiell tilknyting til desse omgjevnadene.

Ellen Henriette er utdanna ved Kunsthøgskolen i Bergen og Kuvataideakatemia i Helsinki. Ho bur og jobbar i Oslo. Ellen Henriette har hatt separatutstillingar ved m.a. PODIUM, Kunsthall 3,14, Oppland Kunstsenter og BABEL visningsrom for kunst. Ho har gjennomført offentlege utsmykkingar til Huseby skole i Trondheim og Holm Landhandel i Hjartdal, og er innkjøpt av fleire offentlege samlingar, bl.a. Trondheim kunstmuseum, Buskerud kunstsenter og Telemark fylkeskommune.

Marthe Kampen

Marthe Kampen (f. 1986) er utdanna frå Kunsthøgskolen i Oslo. Ho er busett og arbeidar frå atelieret sitt i Eidskog saman med Johannes Borchgrevink Hansen. Dei samarbeider tett om utsmykningar, men prioriterer også kvart sitt kunstnarskap. Dei jobbar med fargesterke og vitale uttrykk som dei vrir i kvar si retning.

Marthe Kampen har stilt ut i gruppeutstillingar m.a. ved Nasjonalmuseet, Kunstbanken på Hamar og Kunstnerforbundet, og har hatt separatutstilling ved Dropsfabrikken i Trondheim. Marthe og Johannes har utført større utsmykningar i Søgne og ved veterinærinstituttet på Ås, og jobbar mot nye prosjekt ved Drammen sykehus og Fornebubanen, samt Lysaker t-bane stasjon.

I Galleri Ullinsvin vil Marthe vise tekstil og pastell.

Johannes Borchgrevink Hansen

Johannes Borchgrevink Hansen (f. 1982) er utdanna frå Kunsthøgskolen i Oslo. Han er busett og arbeidar frå atelieret sitt i Eidskog saman med Marthe Kampen. Dei samarbeider tett om utsmykningar, men prioriterer også kvart sitt kunstnarskap. Begge jobbar med fargesterke og vitale uttrykk som dei vrir i kvar si retning. 

Johannes har  stilt ut i gruppeutstillingar m.a. ved Nasjonalmuseet, Kunstbanken på Hamar og Kunstnerforbundet, og hatt  separatutstilling ved Dropsfabrikken i Trondheim. Johannes og Marthe har utført større utsmykningar i Søgne og ved veterinærinstituttet på Ås, og jobbar mot nye prosjekt ved Drammen sykehus og Fornebubanen, samt Lysaker t-bane stasjon.

I Galleri Ullinsvin vil Johannes vise tusjmaleri og tresnitt.

Hans Kristian Borchgrevink Hansen

Hans Kristian Borchgrevink Hansen (f. 1985) er utdanna ved Nordland kunst- og filmfagskole, Kunstakademiet i Oslo og Kunstakademiet i Bergen. Hans har hatt utstillingar på visningsstader som Künstlerhaus Bethanien i Berlin, Trafo Kunsthall, Røgden Bruk og Kunstnerforbundet. Han har gjeve ut bøkene Home and Away og Mot havranden – en nordatlantisk turguide.

Hans Kristian er svært variert i uttrykksforma, og jobbar med både teikningar, måleri, animasjon, keramikk og bøker. Han er oppteken av alt vi ser rundt oss. Han hentar inspirasjon frå små detaljar, og let dei få plass i verka sine.